ইচ্চে ১৭ নবেমবর নান্যাচর মেসাকার বা গণহত্যা দিবচ

হবর
নান্যাচর মেসাকার ডে
১৭ নবেমবর, ২০১২
শনিবার
মোনত্তুগ ডেক্স

মোনত্তুগ: ইচ্চে ১৭ নবেমবর নান্যাচর মেসাকার বা গনহত্যা দিবচ। ১৯ বজর আগে ১৯৯৩ সালঅত রাঙামাত্তে নান্যাচর সা-ডিস্তিকতঅত এ ঘদনা ঘোদেইওন আর্মি আর সেটলার বাঙালে একজধা ওনেই। এ ঘদনাত ৩৭/৪০ জন জুম্মরে তারা মারেই ফেলেইওন। শত শত জুম্মরে রোগুনি গুজ্জোন।

নান্যাচরঅত বাজার বারঅত পিসিপি ১৯৯৩ সালঅত এগ্গো মিসিল ডাক্কে। সে সময় বাজার বার বুধবার এলঅ। বাজারঅত হাজাঅ উগুরে জম্ম ইচ্চোন। আর্মি আর সেটলার মিলিনেই সে মিসিললোত এতাক গরন, সমারে সমারে বাজারঅ জুম্মউনো উগুরেও এতাক গুজ্জোন। বাজারঅ মানুচ্চুনে নিজঅ পরান বাজেবাত্তেই পানিত ঝাম দোন। সেতলারউনে তারারে তোগেনেই বল্লম-শিক দিনেই ভেন্দে ভেন্দে মাজ্জোন। ভালক্কন ধুরি এতাক চুল্লে। তারপরে ত্যা তারা হেমা দোন। হালিক এতা ভিদিরে তারা ৪০ জন মত জুম্ম মারেই ফেলেইওন। হিলওত ডাঙর ডাঙর মেসাকারঅ ঘদনা ডজনঅ উগুরে উইয়ে। হালিক এ ঘদনা পিজে যে আর্মি চেলা আর সেতলার যুক্ত এলাক তারা কোনোসময়ই শাস্তি নহ পান। বরং তারা সরকারঅ সিদু পুরসকার পিওন।

ইউপিডিএফ আর তার সাব অরগান পিসিপি-ডিওয়া্ইএফ নান্যাচর মেসাকার দিবচ পালেইএ। তারা নান্যাচর- হাগারাসুরি-দিঘীনালা-চাদিগাঙঅত এ দিবচচো পালেইওন ভিলি হবর পা জিএ।